Por un aplazamento da Festa do Marisco en Outes ata que se reactive a campaña marisqueira

Compromiso Por Galicia solicita cando menos un aprazamento da Festa do Marisco de Outes ate que se reactive a campaña marisqueira.

Xosé Ramón Riomao e Xosé Manuel Ramos presentaron esta mañá no rexistro do Concello de Outes un escrito solicitando o aprazamento da Festa do Marisco ate que a toxina, que ten en vela a  1.800 persoas, desapareza por completo e se reactive a campaña marisqueira na Ría de Muros e Noia

Os concelleiros de CxG non entenden a falta de sensibilidade do rexedor outiense ao levar a cabo a festa do marisco este domingo. Consideran que “non é momento de festexar absolutamente nada” e que “ temos 1.800 familias que levan 15 días  a espera que se volva a mariscar e ganarse un soldo”.

Xosé Ramón Riomao incidiu en que o obxectivo desta festa debe ser a exaltación do marisco da nosa Ría, é que non ten sentido que se leve a cabo este festexo se todos os polígonos galegos están cerrados.

CxG propón un aprazamento para que a materia prima que se ofrece aos visitantes sexa propia da nosa Ría, e polo tanto que se adquira na lonxa do Freixo o que repercutiría no sector marisqueiro.

Tamén solicitaron que se cambie o enfoque da festa, creando unhas xornadas nas que  se den a coñecer as tarefas do mundo do marisqueo, nas que se fagan partícipes do evento os restauradores de Outes, as Confrarias de Pescadores de Noia e de Muros, e a calquer outra persoa ou entidade que contribúa a posta en valor dos productos da nosa ría e da actividade mariscadora.

Ademais insisten en que o marisco non pode vir de fóra xa que hai que dar a coñecer e por en valor o noso marisco, e para elo é imprescindible mercalo nas lonxas da Ría de Muros e Noia  e non nas de outros concellos de Galicia ou do MUNDO.

Aproveitaron esta visita ao Concello de Outes para rexistrar a moción de copagamento dos tratamentos para enfermos crónicos e de cancro, co fin de que o Concello de Outes asuma ese 10% do custe total.